Eyravegur 34 er í göngufæri frá miðbæ Selfoss

Selfoss leynir á sér. Bærinn hefur vaxið ört á undanförnum árum og er nú þegar orðinn svo fjölmennur að öflugt atvinnulíf og þjónusta stendur traustum fótum.

Þar sem lífið á sér stað

Höfuðstaður Suðurlands

Það eru innan við 5 mínútur í allt

Njörður og Sally Ann búa á Selfossi ásamt börnum sínum þremur, 14 ára, 11 ára og tveggja ára. Þau eru uppalin í bænum og eftir að hafa stundað háskólanám í höfuðborginni og í Danmörku um stund snéru þau aftur heim og hafa verið allar götur síðan.

Íþróttasvæðið er félagsmiðstöð

Fjölbrautaskólinn á Selfossi starfrækir akademíu í samvinnu við íþróttafélagið, þar sem hægt er að fá íþróttaiðkun metna til eininga. Afreksiðkendur í fótbolta, handbolta og körfubolta, ásamt fimleikum, hestamennsku og frjálsum íþróttum eru hluti af akademíunni. „Við erum mjög heppin að búa við þetta fyrirkomulag. Þegar börnin komast á framhaldsskólaaldur, þá vilja þau vera hér áfram,“ segir Njörður.

Íþróttasvæðið er staðsett í hjarta Selfoss, í göngufæri við nánast öll hús í bænum. „Íþróttasvæðið er eiginlega eins og félagsmiðstöð og fyrir fjölskyldu eins og okkar er það nánast eins og okkar annað heimili.“

Aksturinn nýtist til góðra verka

„Við höfum hér allt til alls. Helsti kosturinn við að búa á svona litlu svæði er þessar stuttu vegalengdir. Það eru innan við fimm mínútur í flest allt. Selfoss er mjög barnvænn bær. Það er rólegt að vera hérna, öruggt fyrir börnin. Húsnæðisverð er mun hagstæðara en á höfuðborgarsvæðinu en ef þú þarft eitthvað í Reykjavík, þá eru bara 40 mínútur þangað. Við gætum ekki hugsað okkur að vera annarsstaðar.“

Sally starfar sem þroskaþjálfi í Sunnulækjarskóla og tekur það hana nokkrar mínútur að ganga til vinnu. Njörður er forritari hjá Annata og keyrir til vinnu í Kópavog á hverjum morgni. „Það er ekkert mál að keyra í bæinn. Það tekur 40-45 mínútur og ég nota þennan tíma til að hugsa, hlusta á góða tónlist, hljóðbók, hlaðvarp eða taka símtöl. Þetta er alveg ótrúlega lítið vesen,“ segir Njörður.

Ævintýrastaður fyrir börnin

„Hér er dásamlegt að vera. Hvort sem það er að eyða tíma saman út í garði í góða veðrinu, skreppa í göngutúra með hundinn eða fara í hjólatúra rétt fyrir utan bæinn, þá eru það ákveðin forréttindi að vera með öll þessi útivistartækifæri handan við hornið,“ segir Gunna Stella.

„Mér finnst frábært að geta farið í Gesthúsaskóg, grænt svæði sem er hér í miðjum bænum, svo við tölum ekki um Hellisskóg líka, hinum megin við ána, sem er náttúrulega alveg dásamlegt útivistarsvæði,“ segir Gunna Stella. „Þetta er algjör ævintýrastaður fyrir börnin.“

Hlökkum til næstu ára

Framundan er enn frekari uppbygging, ný hverfi á teikniborðinu og framkvæmdir á nýjum miðbæ eru í gangi.

„Við erum ótrúlega spennt fyrir komandi tímum, sérstaklega miðbænum. Hér í bænum er hægt að sækja alla helstu þjónustu, fara í sund, bíó og slíkt. En að geta hjólað eða rölt niður í bæ, sest á kósý kaffihús og horft á krakkana leika sér fyrir utan. Það er það sem okkur hefur vantað. Við hlökkum mikið til.“